AL CAPONE PA DRITA

Në vend që të shfrytëzohet në maksimum vala e luftës kundër atyre që nuk paguajnë energjinë elektrike, ka disa që merren me polemika shterpë për efektshmërinë ose jo të kësaj beteje për vendosjen e ligjit në Shqipëri.

Ideja erdhi ashtu befas, e shpejtë dhe e thjeshtë si çdo ide gjeniale. Metaforikisht mund të shprehet kështu: lufta për pagesat e energjisë është turbinë që prodhon energji. Idenë e prezantoi kryetari i shoqatës “Boll më”, dr. Dritan Llambaj, i cili rrëfeu edhe historinë se si kishte lindur projekti “Me poç të pastër”.

“Kur zhvilluam konferencën për ligjin e pagesën e dritave, pati nga ata që e kundërshtuan aksionin e qeverisë kundër mospaguesve të faturave. Përkundrazi, ne e mbështetëm hapur qeverinë në aksionin e vet kundër atyre që nuk paguajnë dritat”, tha dr. Dritan Llambaj. “Fakti që për mospagesën e energjisë u arrit të ndëshkohen edhe zyrtarë të lartë, tregon seriozitetin e kësaj qeverie për të luftuar kundër atyre që nuk respektojnë ligjin”.

Kryetari i shoqatës “Boll më” iu referua hapur shkarkimit nga posti të Zv/ministres së Ambientit, e cila nuk kishte shlyer faturën e shtëpisë në det. Shkarkimi i saj në vend, respektoi parimin “ndëshko një për të edukuar njëqind”, ose me fjalë më të thjeshta latine: Unum castigabis, centum emendabis. Nga ana tjetër, nuk mund të harrohen ndjekjet e ndryshme për ata që furnizojnë aktivitete private me korrentin që e marrin fshehurazi nga rrjeti.

Po kështu duhen kujtuar radhët pa fund për të paguar faturat, ose fenomeni i ri i parapagesave: njerëzit kanë filluar t’i paguajnë paraprakisht një vit para dritat nga frika se mos i pushojnë nga puna. Thonë se ka edhe një treg të zi ku faturat e dritave shiten si kambiale dhe disa ekonomistë mendojnë se shpejt do të përfundojnë në bursë nëpërmjet shoqërive që menaxhojnë kredi e letra të tjera me vlerë.

Projekti që iu prezantua si qeverisë ashtu edhe opinionit publik, nëpërmjet mediave joelektronike, është i thjeshtë, sepse e merr zanafillën nga historia e vonë. “Kush e njeh historinë amerikane e di mirë se krimineli i madh Al Capone, u kap dhe u akuzua jo për veprat penale si gangster por për evazion fiskal, pra se nuk kishte paguar taksat – theksoi Llambaj. Në qoftë se ne do ta zëvendësojmë evazionin fiskal me faturat e dritës, do të mund ta mposhtim kriminalitetin ordiner dhe atë të organizuar. Pra, nëse nuk e kap dot aksh kriminel që ka bërë ndonjë të pabërë, mjafton t’i kërkosh pagesën e faturës. Nuk është nevoja të harxhojmë me hetime, gjyqe, dokumente, avokatë, ryshfete”.

Projekti “Me poç të pastër”, shpjegoi ideatori i saj duke iu përgjigjur pyetjeve të shumta nga gazetarët e shumtë, ka si qëllim vendosjen e ligjit në Shqipëri. “Poçi – shtoi ai – duhet të shihet si simboli i dritës dhe i rizgjimit të etikës qytetare”. Vetëm dy pyetje nuk morën përgjigje të saktë: “Si mund të kapet dikush që paguan dritat por që i fik për të përfituar nga errësira?” dhe “Ai që nuk paguan dritat, por ble hidrocentralin, duhet arrestuar?”.