Në numrin e vet të fundit (janar-shkurt 2025) revista dymujore spanjolle La Maleta de Portbou* e drejtuar nga Josep Ramoneda i ka kushtuar një dossier Shqipërisë, të përgatitur e të edituar nga Bashkim Shehu, me kontribute nga Elidor Mëhilli, Edon Qesari, Çapajev Gjokutaj dhe Ardian Vehbiu. Me nismën tonë dhe ndërmjetësimin e Bashkim Shehut, zoti Ramoneda pati mirësinë të na japë lejen për ta ribotuar këtë dossier të përkthyer, në “Peizazhe të fjalës”, për çka e falënderojmë përzemërsisht. Sido që esetë janë shkruar me lexuesin spanjoll në mendje, shkojmë me shpresën që edhe lexuesi shqiptar do të gjejë atje diçka me interes.

Për të mos e vonuar më gjatë botimin shqip, po i nxjerrim esetë në një renditje të ndryshme nga ajo e origjinalit – duke filluar me esenë e Ardian Vehbiut, e cila ndjek versionin fillestar në shqip, jo atë të shkurtuar, që u botua në spanjisht; dhe duke vazhduar pastaj me esetë e tjera, dora-dorës që na vijnë në redaksi (tekstet e Mëhillit dhe të Qesarit janë duke u përkthyer në shqip nga anglishtja).

Lexuesi që ka dëshirë mund t’i shfletojë materialet në origjinalin spanjisht, në linkun që sollëm më lart.

I. PERIFERIA E EUROPËS – Prezantimi i dosjes nga Bashkim Shehu mund ta lexoni këtu.
II. TOKË E NDALUAR, TOKË E PREMTUAR (Pjesa e parë, pjesa e dytë, pjesa e tretë)

(*) Shënim: Kjo revistë, La Maleta de Portbou, e ka marrë emrin në kujtim të Walter Benjamin-it, i cili vrau veten në Portbou, kur po përpiqej t’i arratisej regjimit nazist. Benjamin-i dëshironte të botonte një revistë të mendimit kritik, Angelus Novus, e cila nuk doli kurrë në treg.