Mes thirrjeve për drejtësi dhe vetëgjyqësisë

nga Gjergj Bakallbashi

Nuk i kuptoj thirrjet apo gjestet makabre të protestuesve.

I kuptoj kërkesat e tyre dhe indinjimin për si kanë shkuar punët në Shqipëri.

Shoh për shembull Lanën që kutërbon ditë e natë në zemër të Tiranës dhe dua edhe unë të protestoj, se pse nuk pastrohet dhe pse ujërat e zeza të asaj pjese të Tiranës që i derdh në Lanë, nuk janë futur në kanalet e ujrave të zeza e dërguar në Yrshek për t’u pastruar. Po bëhen gati 16 vjet që impianti i ujërave të zeza të Tiranës ka filluar të ndërtohet e nuk është mbaruar.

Dihet se punë të tilla janë të kushtueshme dhe kërkojnë kohë. Të paktën të ishin ndërmarrë disa hapa.

Dhe për këtë dua t’iu bashkohem protestuesve dhe të kërkoj që ujërat e Lanës të pastrohen.

Ka diçka shumë shqetësuese te fenomeni Lana: duam ta pastrojmë por nuk e pastrojmë dot. Duam që aty të rrjedhë ujë i pastër, por vetë e ndotim. Dhe më bën sens që t’i kërkoj Kryeministrit Rama të pastrojë Lanën. Dhe dua ta dëgjoj se çfarë do të më thotë për pse nuk pastrohet dhe për projektet që ka për ta pastruar.

Dua të ketë drejtësi dhe Lana të pastrohet për të mirën e Tiranës dhe të gjithë shqiptarëve. Por nuk mund ta gjykoj KM-në, e aq më tepër të kërkoj dënim për të. Dua ta dëgjoj se cfarë ka për të thënë.

Ai apo qeveritarët e tij.

Vras mendjen pse flitet për kulla e resorte por nuk flitet për pastrimin e Lanës. Natyrisht asnjë arkitekt, sado i famshëm, nuk do mund të bëjë i vetëm apo e vetme një projekt për të pastruar Lanën. Është një projekt shume më kompleks që kërkon financa dhe miradministrim pa qenë e varur nga kjo apo ajo forcë politike, përfshi dhe forcën apo forcat e reja të cilat mund të lindin nga protestat ne bulevard.

Te njëjtën gjë, nëse vijnë në pushtet, do t’u kërkoja edhe anëtarëve të një qeverie të re: Si do ta pastroni Lanën? Por kurrsesi nuk do ta kërkoja këtë apo atë fat makabër për administratorët dhe politikanët. Do të doja t’i dëgjoja cfarë planesh kanë. Lana nuk pastrohet me vetëgjyqësi!

Dhe duke patur parasysh momentin kaotik shqiptar dhe europian, në vend të memeve makabre, do t’i uroja Edi Ramës për ditëlindje forcë dhe energji per të na shpjeguar si do ta pastrohet Lana. Apo si do të transformohet. Që Tirana të ketë më në fund një park dhe një lumë të pastër në zemër të qytetit.

Dhe nëse nuk ka projekte, do t’u drejtohesha të gjitha universiteteve në Tiranë me lutjen që të uleshin dhe të studionin e propozonin zgjidhje per Lanën. Studime të cilat do t’i botoja në një libër qe do ta quaja “Lana Files” !

(c) 2026 Gjergj Bakallbashi. Të gjitha të drejtat janë të autorit. Imazhi në kopertinë është realizuar me AI.