nga Alket Çani
MAGISTER DIXIT
Mjekra s’të bën filozof.
Mustaqet, po.
CAPITIS DIMINUTIO
Më mirë një mik se një çiflik
Më mirë një fik sesa një mik
Më mirë një tik sesa një fik
Më mirë një . sesa një tik
Më mirë një ik sesa një .
Më mirë një k sesa një ik
UBI BENE IBI PATRIA
Se në qytet më mirë në pyll
Sesa në pyll më mirë në mill
Më keq në mill se bëhesh syll
Sesa në mill më mirë në yll
TË KESH APO TË JESH
Më mirë të jesh sesa të kesh
Më mirë të flesh sesa të jesh
Më mirë të cash sesa të flesh
NE QUID NIMIS
Më mirë syri sesa nami
Më mirë nami se nishani
HOMO HOMINI LUPUS
Burri për burrin është ujk
Gruaja për gruan është ujkonjë
HUBRIS
Punën s’e bën një gisht, por e bën grushti
Punën s’e bën një grusht, por e bën krahu
QUIA NOMINOR LEO
Më mirë një luan në krye të gomarëve
Sesa një gomar në krye të luanëve
ABYSSUS ABYSSUM INVOCAT
Gojën mbylle, sytë mbaji hapur
Sytë mbylli, veshët mbaji hapur
Veshët mbylli, hundët mbaji hapur
Hundët mbylli, goja rri e hapur
VOX CLAMANTIS IN DESERTO
Mendo 100 herë dhe fol 1 herë
Mendo 1 herë dhe fol 100 herë
VOX POPULI, VOX DEI
Shtëpia pa fëmijë si nata pa yj
Nata pa yj si Olimpi pa hyj
Olimpi pa hyj si shtëpia pa fëmijë
URBI ET ORBI
Nga një vërë e vogël rrjedh e gjithë fuçia
Nga një vërë e vogël del krejt gjithësia
CAVE CANEM (I)
Qeni që leh, nuk kafshon
Qeni që nuk leh, kafshon
CAVE CANEM (II)
Qentë le të lehin, karvani të shkojë përpara
Qentë le të mos lehin, karvani të shkojë mbrapa
CAVE CANEM (III)
Përmend qenin, bëj gati shkopin
Përmend shkopin, bëj gati qenin
SI VIS PACEM, PARA BELLUM
Nuk mund të bësh omëletë, pa thyer vezët
Nuk mund t’i thyesh vezët, pa i goditur
FIT FABER FABIENDO
Mos mëso ustanë, po merri zananë
Mos e vra ustanë, pa i marrë zananë
QUALIS ARTIFEX PEREO
Kush mba vesh botën, prish kokën
Kush mba vesh kokën, prish botën
NON OMNIA POSSUMUS OMNES
Kam inat, po s’kam takat
Kam takat, po s’kam surrat
CARPE DIEM (I)
Mos i bjer të mirës me shkelm
Bjeri me dorë
CARPE DIEM (II)
Më mirë një bole sot se dy bole nesër
Më mirë dy bole sot se tri bole mot
SUTOR, NE SUPRA CREPIDAM
Mos i hyr valles kur nuk di ta hedhësh
Mos ia dridh gruas kur nuk di ta dredhësh
REDDE CAESARI QUAE SUNT CAESARIS
Mos kërko qiqra të pjekura në hell
Kërkoji qiqrat të pjekura në diell
IN VINO VERITAS
Ç’bluan mendja, zbulon pija
Dëfton fëmija ç’ka shtëpia
Fëmija është dehur nga pija
TU QUOQUE, MI FILI
Rrit këlyshë të të hanë kokën
Vrit këlyshët të shpëtosh kokën
DURA LEX, SED LEX
Kur flet shkopi, të vret
Kur hesht shkopi, vritesh
NJERIU ËSHTË MASA E ÇDO GJËJE
Kush ka matur veten, ka matur gjithë botën
Kush ka matur botën, ka harruar kokën
ULTIMA VERBA
Gazi i madh kthehet në helm
Helmi i madh kthehet në gaz
(c) 2021 Alket Çani. Të gjitha të drejtat të rezervuara.
Imazhi në kopertinë: Jacek Yerka, Low-Cost Airlines
