nga Arben Dedja

 

Mbreti Genti

Mbreti Genti

u bë trendy

kur Aleksandër Meksi

e dekretoi për dy mijë lekshin.

 

Sulltan Mehmeti i Tretë

Sulltan Mehmeti i Tretë,

i vrau vëllezërit e vet.

“Ishin shumë” tha, “bre!

Ç’t’i mbaja havale.”

 

Blaise Pascal

Blaise Pascal,

qëkur shpëtoi nga rënia me kalë,

këdo haste

për Zotin vinte baste.

 

Marko Boçari

Marko Boçari

i thosh në vesh çdo ushtari:

“Mësojeni mirë fjalorin tim,

të dini si t’i shani Bushatllinjtë.”

 

Giacomo Leopardi

Giacomo Leopardi

s’kish sy leopardi,

por e pa nga ajo kodrinë

pafundësinë.

 

Theodor Billroth

Theodor Billroth

i tha Brahms-it: “Johannes, jo kot

stonova dje në violinë:

s’e hiqja dot mendsh bisturinë.”

 

Jean-Martin Charcot

Jean-Martin Charcot:

një nxënësi yt që pinte puro

e rrinte i ulur në fund,

më duket e quanin Sigmund…

 

Baroni Franz Nopcsa

Baroni Franz Nopcsa

tha: “Megjithëse u tërhoqa

nga gara për Mbret të Shqiptarëve

s’ra poshtë dhjetës numri i kandidatëve.”

 

Miss Edith Durham

Miss Edith Durham

s’pinte duhan.

“Ta mësojmë ne” i thanë burrneshat,

“kur të mblidhemi në Nënshat.”

 

Mustafa Qemal Ataturk

Mustafa Qemal Ataturk

kur veshi kallpak edhe qyrk,

në Europë e lëvduan

dhe… e kopjuan.

 

Isa Boletini

Isa Boletini

rrugës së kthimit

nga Londra nuk e gjet’

revolen e tretë.

 

Qemal Stafa

Qemal Stafa

ç’të ngriu qafa:

me Udhëheqës të vjetër e të rinj

çdo maj në fotografi.

 

Mahatma Gandhi

Mahatma Gandhi

e urrente nagantin,

hante mëmëligë,

vinte shëndetlig.[1]

 

Mihal Mihaloviç Bahtin

Mihal Mihaloviç Bahtin,

dorëshkrimin për Dostojevskin që e pati

me vete në Kazakistan

e drodhi duhan.

 

Valéry Giscard d’Estaing

Valéry Giscard d’Estaing,

king si aktor filmash western,

i pëlqente shtetet afrikanë

me shumë savanë.

 

Iljaz Çeço

Iljaz Çeço

tha: “Do t’ia bëj si çeço

golin Partizanit,

po i ika Rragamit.”

 

Paolo Rossi

Kur te Paolo Rossi

vinte krosi:

si magnet

topi e gjente vetë.

 

Bettino Craxi

Bettino Craxi

tek hipte në taksi

ia kthyen mbrapsht menjëherë

bakshishet lënë kamarierëve.

 

Gjon Pali i Dytë

Gjon Pali i Dytë

i picërroi mirë sytë.

Kështu ia pa Ali Agçait plumbin

dhe Gorbaçovit gushëpëllumbin.

 

Benedikti i Gjashtëmbëdhjetë

Benedikti i Gjashtëmbëdhjetë

nga Froni i Shën Pjetrit zbriti vetë.

“Më ranë kërbishtet”

tha, në latinishte.[2]

 

Kryepeshkopi Janullatos

Kryepeshkopit Janullatos

ja ndaluan tavën me kos.

“Të ha” tha, “të paktën pak xaxiqis,

se në plis nuk rri iriqis.”

 

Aranit Çela

Aranit Çela

tha: “Ç’të jenë çengela

që kasapëve bosh u mbeten,

merruani, se na duhen për Degën.”

 

Hajredin Çeliku

Hajredin Çeliku

tha: “Eh, o lum miku,

me këtë llagapin

veç në Byro mund ta mbaja vrapin.”

 

Adriatik Llalla

Adriatik Llalla:

s’i pëlqen më dhalla,

as taksidari;

veç “Ferrari”.

 

Musa Ahmeti

Musa Ahmeti

tha: “Kjo kockë e gjeti

Teodor Shkodranin,

që s’po do të lëvizë nga Vatikani.”

 

[1] Alternate take:

Mahatma Gandhi

Mahatma Gandhi

e urrente nagantin,

s’hante llukanik,

vinte shëndetlig.

 

[2] Alternate take:

Benedikti i Gjashtëmbëdhjetë

Benedikti i Gjashtëmbëdhjetë

nga Froni i Shën Pjetrit zbriti vetë.

“M’u këputën kryqet”

tha, dhe bëri kryq.

 

(c) 2021 Arben Dedja. Të gjitha të drejtat të rezervuara.