Edhe sivjet kam lexuar plot libra. Ja një listë e tyre, që gjithsesi nuk mëton të jetë shterruese:

– Geraldine Shields, Ecja e maces nëpër natë (titulli origjinal: Catwalk in the dark, përktheu nga anglishtja: Mimoza McAdams), roman, Sh. B. Rilindja (1996), fq. 385, blerë mijëvjeçarin e kaluar, s’më kujtohet mirë se ku;

– Venemin Kodra, Pesha e padukshme e reve, roman policesk, Sh. B. Nëntori (2014), fq. 188, marrë hua nga biblioteka e mikut tim A.V. (nuk ia ktheva më kurrë);

– Bleri Kondi, Rënoja të reja, tre poema, Sh. B. Naim Frashëri (1989), fq. 215, blerë nën plepin e parafundit të qoshes verilindore të bordurës te Parku Rinia;

– Ilion Spiro dhe Halit Nallbani, Roli i germës ‘ë’ në Lidhjen e Prizrenit, esé historike, Shtëpia e Librit Mësonjëtorja (2015), fq. 512, blerë në Shkodër, libraria Elidon;

– Lirikat e gurit. Transkriptime nga muret e burgut 313, përgatiti dhe përzgjodhi Dominik Pali, antologji poetike, Sh. B. Kanuni i Lekës (2013), fq. 338, gjetur nën derën e apartamentit;

– Zenun Bishtuku, Ku je nënë? Ku je bashkëshorte? Antropologjia e mërkoshit, parathënia nga Halil Matraku, studim, Sh. B. Dija Enciklopedike (2012), fq. 702, blerë në Tiranë, tregu i trotuarëve (rilexim);

– Pende Zijai, Motive qendismash të vajzave partizane, pasthënia nga Trim Morina, studim historik, Sh. B. Bellovoda (2009), fq. 112 + 16 fotografi me ngjyra, blerë s’di se ku;

– Katuli, Poezia erotike, përktheu klasa e 3D e gjimnazit “Sami Frashëri” nën kujdesin e pedagoges Pranvera Marko, Sh. B. Pika pa sipërfaqe (2017), fq. 88, homazh nga botuesi;

– Guximtar Shkreli, Gjolet e turbullta të kujtesës, poezi, Sh. B. Fidani (2016), fq. 98, dhuratë me autograf nga autori;

– B. J. James, Nën peshën e dhimbjes (titulli origjinal: Shifting under), përktheu nga anglishtja Irida F. Beluli, redaktoi Fatmir Beluli, roman distopik, Sh. B. Koha (2002), fq. 1666, blerë në plazhin e Durrësit (lexim vertikal);

– Sefedin Beshaj, E bija e piratit, roman, Sh. B. e panjohur (viti i botimit: ?), fq. 420, e-book, shkarkim pirat;

– Haxhi Dede Alban Topalli, Ëndrrat e mia, studim fetaro-psikanalitik, Sh. B. Ardhmëria (2001), fq. 334, marrë te biblioteka e lagjes (lënë përgjysëm);

– Jaho Shemo Hito, Unë, Ana Bolena – vajzë vlonjate, roman historik, botuar në Amazon (2011), fq. 492, blerë në Amazon;

– Fjalor i Filozofisë Shqiptare, përgatitur nga Artan Guga dhe Fatosh Pano, vëllimi III (dalë gabimisht përpara vëllimit I dhe II), Sh. B. Dija Enciklopedike (2008), fq. 927, blerë te Libri Universitar;

– Hasan (Kristo) Lëshenja, Vragshëm zbet loti ose Mallkimi i bushtrës, poezi të mërgimit, Sh. B. Shqiponja (2012), fq. 271, dhuratë nga e ëma e autorit;

– Leonard Kromi, Biznesi ynë në Tiranë: një histori suksesi, libër motivues, Sh. B. D&S (2015), fq. 375, shpërndarë falas te kioskat për kë blen gazetën Sporti Popullor (lexuar vetëm ballina);

– Omer Buda, Nga Toskëria në Toskanë: jetëshkrimi i një falltari, autobiografi, Sh. B. Besëlidhja (2017), fq. 357, blerë në librarinë Adrion (duke e lexuar, jam te faqja 112).

Po ju?