0.
Arti i Biografisë
ndryshon nga i Gjeografisë.
Gjeografia flet për Toka,
pa Biografia për Koka.
Edmund Clerihew Bentley, Biography for Beginners (1905)
Ali Pashë Tepelena
Ali Pashë Tepelena
i therte kundërshtarët në pelena.
Simpatizonte Anglinë
dhe tepsinë.
Arben Dedja
Boton në shqip vëllimin e tij të parë me tregime, titulluar Amputime të zgjatura.
Nga qejfi e përkthen vetë në italisht dhe ia botojnë edhe në vendin fqinj.
Meqë cilësia e përkthimit është e lartë, i amputojnë disa nga prozat.
Avni Rustemi
Avni Rustemi
ç’e vrau qenin.
Pastaj dhe atë e vranë
siç ndodh në këto anë.
Bano Tanushi
E burgosën se si përgjegjës i shpërndarjes së kafes në kryeqytet (100 gr/muaj për familje) filloi të kish autoritetin e vetë Diktatorit.
Bardhyl Kondo
Si çdo tragjik kish rrathë të zinj rrotull syve dhe qese të varura poshtë tyre.
Shkruante komedi.
Epaminonda Bulku
Sapo skulptori, për të shpëtuar kokën, i theu me varé nudot e veta, Regjimi ra.
Në lakuriqësinë që pasoi nudoja e humbi krejt sharmin, ndaj vdiq i kënaqur me veten.
Estref Ekonomi
Pyeti ekipin mjekësor a ta shiste lopën e vetme për të përballuar shpenzimet shëndetësore dhe të gjithë qenë dakord.
Gjergj Kastrioti
Megjithëse ishte mbi tre vjeç, vazhdonte të pinte qumësht nga e ëma.
Përpiqej më kot t’ia zvjordhte gjinjtë e fishkur.
– Është shumë e milë, mami!
Harallamb Fagu
Mbasi merrnin pjesë në disa mbledhje të gjata e intensive, pranoheshin anëtarë byroje vetëm ata kandidatë që dinin të hanin mirë thonjtë (onikofagi).
Kurse ai u kooptua drejtpërsëdrejti nga baza, nga komunist i thjeshtë me një fjalë, kur u mor vesh që ish në gjendje, gjatë mbledhjeve tejet intensive, të hante edhe thonjtë e këmbëve.
Herkul Barbari
E lidhi ariun te shtylla elektrike kundruall Bashkisë dhe i bleu një krikëll birrë.
Ije Farka
Kish ruajtur kockat e një pule ngrënë tre vjet më parë.
Ia hidhte supës dhe ato notonin në kusi.
Krijonte kështu iluzionin se po hanin supë me lëng mishi.
– Të lumshin duart, mome!
Ilia Teneqexhi
Si shpikës në kohën e diktaturës i të ashtuquajturës “kanoçe”, Presidenti i Republikës i dha titullin e lartë “Nderi i Kombit”.
Jeton Buzuku
Pinte egër për javë të tëra dhe ishte e pamundur ta shqisje nga gota.
Pastaj, befas, pushonte, kthjellohej dhe për nja 1 javë – 10 ditë i hynte një detoksikimi të ngadalshëm.
E kuptonim që do t’ia fillonte prapë kur e niste bisedën me frazën:
– Eh, vita koklavita!
Kulla e Sahatit
Viti 2036: bëhet ngrehina më e ulët e qendrës.
Viti 2051: ndërtesat e tjera i ka aq ngjitur, sa pranë saj mund të ecet vetëm në rresht për një.
Viti 2070: një rrëshqitje dheu në themele e lë përgjithmonë të pjerrët.
Viti 2102: shiu pikon brenda, katër fushët e orëve bosh.
Vullnetarë tashmë transmetojnë orën që brenda barkut të kullës.
Krahët luajnë rolin e akrepave; atë që tregon minutat të shtrirë krejt, tjetrin, të orëve, mbledhur për trupi: i rrotullojnë ngadalë, hija e tyre tragjikomike projektohet nëpër qytet.
Marash Kuqi
Ishte i vetmi nga ata që e dinin përmendësh Lahutën e malcís që ia kuptonte fillin e kuq të ngjarjeve poemës.
Në fillim nuk e merrnin vesh si ia kish arritur kësaj, gjer doli që kopja e tij e librit, nga ku nxinte përmendësh poemën, kish qëlluar me defekt në qepje: radha e këngëve ishte bërë lëmsh.
Mërgim Macaj
Ditën na hidhnin me helikopter, brenda stadiumit ku ishim strukur, bukë e kripë e zemër.
Natën na merrnin grupe-grupe për të na riatdhesuar me avionë të linjës.
Prisnim radhën duke ndjekur bizhdollanët e zinj që dilnin nga themelet shekullore të stadiumit dhe shuanin etjen me djersën që na pikonte.
Mihal Duro
Çunat e vegjël vijnë një nga një tek ai: u jep kallashnikovin, shpjegon si të qëllojnë.
Vënë në shënjestër dritaret përkundruall.
Të nesërmen kthehen prapë; dikush me municion me vete, për të qëlluar më gjatë.
Prindërit i presin pas dere.
Nik Krie-shpi
Pasi shkroi, epshërisht, në shqip vargjet:
Kur u rrite, e hjèshmja jime,
stisi tij atò di molla,
të përsisme edhe të holla,
çë të mblojën atë gji
u bë menjëherë kryeministër i Italisë.
Pashko Vasa
Pashko Vasa
është Vaso Pasha.
Lojë fjalësh?
Fe shqiptarësh.
Ramiz Zalia
Ishte nder i madh që organizimin e ceremonisë mortore të Mjeshtrit ia caktuan pikërisht atij.
I kishte të gjitha kartat në rregull: më parë pat organizuar ceremoni të vogla ditëlindjesh, pagëzimi, fejese, syneti…
Rrita Ora
– Mami, unë u rrita tani!!
Shkurte Pal Vata
Shkurte Pal Vata
jo veç i mëshoi ca si fort lopatës,
por shpiku dhe babanë e vet
si barceletë.
Think Tanga
Sigurisht nuk kish këtë emër, por e thërrisnin kështu falë aftësisë për të nxjerrë në pah breçkat gjatë mbledhjeve të bordeve të shumtë ku bënte pjesë e sidomos gjatë takimeve të një Think Tank-u e të cilës qe Presidente.
Dalëngadalë emri i vërtetë i humbi palëve të saj të thella kofshore.
Vasil Laçi
Vasil Laçi:
patllakja i ngeci;
s’i tregoi shokët
i krehu flokët.
Veli Kushi
Kërkoi leje në Organizatën Bazë t’i vinte djalit emrin e të vëllait, Hero i Popullit, por Partia pati të drejtë që i tha “Jo!”: shumë i rëndësishëm heroi, shumë diarre foshnja.