Vras mendjen mos ky gabim në afishen e një pjese teatrale vënë në skenë tani së voni në Teatrin Metropol, Tiranë nuk është veçse “gabim”, ose lojë post-moderne me drejtshkrimin.

Mungon i-ja e gjinores – dhe sigurisht jo për arsye vendi.

Me një komedi të Dario Fo-së, marifete të tilla edhe mund t’i presim.

Përndryshe, kështu siç e kanë shkruar, duket sikur është fjala për diçka që ia thotë rikonstruksioni çiftit, për shembull:

RIKONSTRUKSIONI ÇIFTIT: Divorcohu!

Puristët këtu kushedi do të distancoheshin edhe nga fjala rikonstruksion, por mbase përgjigjja për këtë gjendet në tekstin e komedisë: mjaft që ta ketë vënë në thonjëza.

(Puristët mund të distancohen edhe nga titulli që i kam vënë unë këtij shënimi – por edhe unë e kam rrethuar atë fjalë frëngjishte me thonjëza… imagjinare.)

Përkundrazi, mungesa – në rastin tonë e një nyjeje të parme – është e vështirë për t’u vënë në thonjëza.

Shënim: Për t’u përgëzuar, megjithatë, përdorimi i Ç-së së madhe në publik dhe shmangia – kaq problematike këto kohë – e pikëçuditëses.