Aerofagi – Një lloj kanibalizmi, kryesisht ndaj stuardesave në avion.

Agorafobi – Frikë e tepruar nga rrënoja qytetesh greke antike.

Alabastër – Platformë bastesh për alabakë.

Anestezi – Paaftësia e dikujt për të reaguar estetikisht gjatë kohës që dergjet në shtrat.

Arkeomarksist – Dijetar që zbaton mësimet e Marksit në arkeologji.

Armadillo – (1) Syndyk tradicional aztek për ruajtjen e stolive nusërore; (2) Qendër ambulante për grumbullimin e emigrantëve meksikanë në Texas.

Ballkanizim – Teknikë artizanale e copëtimit të bakllavasë.

Barbarí – Dukuria e shëmtuar e ngrënies së barit nga vetë barinjtë.

Binjakëzim – Ngushëllim i fundit për ata që nuk u klonuan dot.

Cimbal – Instrument kirurgjikal në trajtë pincash të pjerrëta, që përdoret për të këputur ligamentet që mbajnë të mbyllur një sfinkter çfarëdo.

Cirkumferencë – Konferencë për probleme të cirkut.

Defloracion – Akti i çrrënjosjes së luleve nga një lëndinë.

Desalinizim – Çfarë mund të ndodhë një ditë në PD.

Elektroshok – Mik elektricist.

Encefalit – Helikopter për transportim elefantësh brenda një parku safari.

Eurosocializëm – Ortakëri për koleksionistë eurosh.

Evangjelizim – Promovim agresiv i emrit Vangjel për fëmijë meshkuj.

Fotosintezë – Teknikë e përftimit të dritës në kushte laboratorike.

Futurizëm – Rrymë letrare e karakterizuar nga përdorimi sistematik e obsesiv i foljeve në kohën e ardhme. Shih edhe: Pasivitet.

Gauleiter – (1) Ruajtës patash në Galinë pararomake; (2) Qen udhërrëfyes për gjermanë të verbër.

Gjirokastroj – tredh simbolikisht dikë duke ia refuzuar paratë.

Goniometër – Instrument matës i potencës seksuale të demave ndërzimtarë.

Gorgonxola – Dhi mitologjike që thuhej se jetonte në Alpet në kufirin franko-zviceran.

Helmetë – Pilulë e sheqerosur, por me helm brenda.

Heroinoman – Maniak seksual që lektiset pas grave të Realizmit Socialist.

Hipnozë – Marrëdhënie jashtëmartesore midis një psikanalisti dhe një pacienteje.

Hipospadi – Dorë në letra e karakterizuar nga një mungesë shqetësuese maçi.

Histerektomi – Ndarje më dysh e historisë, zakonisht për shkak të një femre.

Kabal – Valle e fshehtë burrash në Përmet a Kolonjë, e shoqëruar me gërnetë.

Kaligrafi – Beletristikë kuajsh.

Kazuistikë – Festa tradicionale e mbjelljes së pishave ndër jezuitët.

Kinostudio – Laborator shkencor për studimin e qenit si të tillë.

Kokainë – Kokore e trashë leshi, në dotacion të ushtrisë maqedonase.

Kolecist – Ithtar a dishepull i një personi të quajtur Kolec.

Kolonoskopi – Vendosje teleskopësh në kolonë, për qëllime relativisht proktologjike.

Kombinacion – (1) Komb, nacion; (2) Kombinat shumëkombësh.

Kompakt – Thuhet për diçka që është a bëhet në pajtim me një pakt a marrëveshje.

Konkubinazh – Lëvizje për të lejuar gra të pilotojnë avionë civilë kryesisht në Zvicër.

Konkubinë – Femër pilote; shih edhe Mantenutë.

Kontrabufe – Grua rivale në dashuri, shemër.

Koreografi – Arti i të vizatuarit në koren e bukës.

Korno engleze – Vegël seksuale e preferuar prej gay-ve britanikë.

Korporatë – Nevojtore për përdorim vetëm nga korporalët.

Kriptografi – Art i të mbishkruarit në kristale të kripës së gjellës.

Kriptozoologji – Arti i të ushqyerit të kafshëve me kripë gjelle.

Kromatizëm – Helmim kronik nga kripra të kromit.

Laureat – Dikush që ka nevojë të lahet, person i bërë shumë pis.

Manipulim – Teknikë tanimë e vjetëruar e mbytjes së pulave me duar.

Manometër – Aparat matës i frekuencës së masturbimit.

Mantenutë – Në kabinën e fluturimit të një avioni, levë që duhet mbajtur gjithnjë në pozicion horizontal.

Megafon – Hiper-telefon, për përdorim protokollar nga burra shteti.

Mekonium – Elementi i katërt transuranik.

Meteorologji – Art i parashikimit të motit nëpërmjet studimit të meteorëve.

Metronom – Përgjegjës për ruajtjen e rregullit publik në metro.

Ministër – shih Portofol.

Monarkist – Person që beson se monarkët ekzistojnë.

Mononukleozë – Doktrinë gjeopolitike sipas së cilës çdo shtet duhet të ketë të paktën një bombë atomike.

Nanoteknologji – Teknologji e posaçme në shërbim të personave me probleme të shtatit.

Nazalizëm – Në Kanunin e Lekës, sanksionim i ndëshkimit me një grusht hundëve.

Nostalgji – Dhimbje në hundë; formë e lehtë e sinusitit.

Obstetrikë – Art i vjetër gjerman i ndarjes së frutit më katërsh.

Olivinë – Koncetrat bërsish nga punishtet që prodhojnë vaj ulliri.

Oposum – Kundërshtar a rival, zakonisht gjatë një fushate elektorale.

Ovacion – Shprehje e entuziazmit për dikë duke e goditur me vezë.

Pagodë – Omeletë me vezë palloi.

Parlamentarizëm – Delir i dikujt që e pandeh veten deputet.

Pasivitet – Përdorim i tepruar i diatezës pësore të foljeve nga një burrë shteti.

Pasterizim – Pastrim i kujdesshëm i një hoteli ose i një shtëpie pritjeje.

Pastoral – Djathë gjerman i pasterizuar.

Pentagram – Njësi matëse e peshës në Kishën Ortodokse, e barasvlershme me pesë gram.

Perimetër – Cirkumferencë e matur me pe.

Poligon – Politikan që e sheh një problem nga disa këndvështrime njëherësh.

Poliomielit – Shkëmb metamorfik, i formuar kur fosile të panumërta bletësh punëtore u nënshtrohen trysnive të larta të mantelit.

Portofol – shih Ministër.

Post-feminizëm – Doktrinë apologjetike e martesës së vonë.

Post-modernizëm – Psikozë senile që haset mes autorësh modernistë.

Purgativ – Në vendet borgjezo-revizioniste, punonjës i policisë i ngarkuar për të marrë në pyetje të arrestuarit më kokëfortë.

Radioaktiv – Personalitet radiofonik.

Rakitizëm – Dobësim i kockave si pasojë e konsumit të tepruar të rakisë ose të kikirikëve.

Republikan – Promotor ribotimi librash përndryshe të harruar.

Retrospektivë – (1) Parapëlqim i sëmurë për filma italianë bardhezi; (2) Ekzaminim me sy të lirë i orificit anal nga ana e mjekut specialist.

Rrospital – Qendër për kurimin e sëmundjeve veneriane (zakonisht në Itali).

Sekspert – trajner i erotizmit aerobik.

Shah-sheh – Ceremoni tradicionale e monarkisë persiane, gjatë së cilës mbreti dhe mbretëresha parakalonin të hipur të dy në të njëjtin kalë.

Sinkopë – Momenti kur i bie të fikët dirigjentit të një orkestre.

Sklerodermi – Sklerozë së cilës nuk i gjendet dermani.

Skoliozë – Dëshirë a trill i papritur i një personi të moshuar për t’u rikthyer në bangot e shkollës.

Splenomegali – Pseudoteori nacionaliste, sipas së cilës grekët e vërtetë njihen nga shpretka.

Stereofoni – Bisedë telefonike me dy persona njëherësh.

Stratigrafi – Studim i bëmave të strategëve të shquar.

Tabula rasa – Rezultat i dobët në qitje.

Teserakt – Akt i dorëzimit të teserës anëtarit të sapopranuar të një partie.

Tiramisu – Një lloj zharretiere e fshehtë për kuzhiniere të mbipesha.

Tonazh – Njësi matëse për sasinë bruto të makijazhit të përdorur.

Topologji – Degë e balistikës që studion trajektoren jo të predhës, por të topit vetë gjatë qitjes.

Vaginizëm – Efekt anësor i rezeksionit të nervit vagus.

Vazokonstriktor – Gjarpër shtëpiak, që e ka zakon të shtrëngohet rreth saksive.

Vivipare – Gra të cilave u rrojnë vetëm fëmijët e parë.

Zodiak – Rojtar mitologjik i parkut zoologjik në Olimp.

MaGje