MENDIME TË PAKREHURA (LVII)

(nga Stanislaw Lec*)

Gjithnjë drejtoju zotave të së tjerëve. Do të të japin audiencë pa qenë nevoja të mbash radhën.

Luftojmë për të drejtën e përjashtimit. Po le ta pyesim, pra, përjashtimin, nëse është dakord që “të konfirmojë rregullën.”

Fjala mund të shërbejë edhe si shtupë për gojën.

Disa pemë rriten kaq shumë, sa frutat e tyre u bien në kokë fqinjëve.

Kush e ka humbur mendjen, ka shpesh dhimbje koke.

Kur shoh fëmijët të ngrenë një njeri prej bore, pyes veten: “Ia vlen të ta ngrenë statujën për kaq pak kohë?”

Prekëse janë kujtimet e kujtimeve.

Mund të ndërrosh fé pa ndërruar Zot. Dhe e kundërta.

Në sytë e mi, kanonizimi i vret ata njerëz që mund t’i kisha konsideruar si të shenjtë.

Për të mëdhenjtë, mësimet e shkencës. Për të vegjlit, mësimet e jetës.

Plagët zënë kore, por koret vazhdojnë të rriten me ne.

Shenjat e gishtave të Zotit nuk janë kurrë dy herë po ato.

Edhe kur je duke gjuajtur elefantin, të duhet të vrasësh herë pas here ndonjë plesht.

Pati edhe martirë që e bënë rrugën e kryqit në drejtim të kundërt.

Ndonjëherë duhet ta mbyllësh gojën, që të të kuptojnë.

Thoshin për të që nuk është shqiponjë, dhe shtonin: “E ka trurin sa të zogut.”

Çfarë besoj? Në Zot, nëse ky ekziston.

Fytyra e armikut më tmerron, që nga momenti kur shoh sa i ngjan simes.

Merita për zbulimin e Amerikës nuk u takon amerikanëve. Çfarë turpi!

Te paradhoma e ferrit, mos iu lëpi menjëherë Satanait.

Çfarë i ndodh Djallit kur pushon së besuari në Zot?

Në qafën e gjirafës, pleshti fillon të besojë në jetën e amshuar.

Pashë në ëndërr një reklamë për kontraceptivët: “Ata që nuk do të lindin, do t’ju bekojnë!”

Si e di era se në ç’drejtim duhet të fryjë?

Mos u besoni zotave që janë në imazhin tuaj!

Kish një opinion kaq të lartë për veten, sa i dukej ndonjëherë se nuk ishte veçse xhuxhmaxhuxh para saj.

Mos u familjarizo shumë me veten!

Çelësi i situatës shpesh gjendet në bravën e fqinjit.

 


(*) Stanislav Lec (Stanisław Jerzy Lec, 1909-1966), shkrimtar polak dhe një nga aforistët më të mëdhenj të shekullit XX. Materialin më sipër e kam përzgjedhur dhe përkthyer nga përmbledhja e tij Nouvelles pensées échevelées (frëngjisht).

Lini një përgjigje

Zbuloni më tepër nga Peizazhe të fjalës

Pajtohuni tani, që të vazhdoni të lexoni dhe të përfitoni hyrjen te arkivi i plotë.

Vazhdoni leximin