Prej vitesh jemi mësuar ta përdorim Amazon.com jo vetëm si dyqan, por edhe si pikë referimi për librat dhe muzikën – jo rrallë, kur përmendim një autor a një vepër letrare, e lidhim me një hiperlink me faqen përkatëse në Amazon.
Mirëpo edhe kolosi i Jeff Bezos-it gabon: dhe ndonjëherë gabimet i ka të mrekullueshme.
Duke shfletuar në kërkim të një libri të Borges-it, më del përpara kjo llahtari:
Një libër me titullin Fa(h)renheit 451, i atribuohet, besoj gabimisht, argjentinasit të madh; por imazhi i kopertinës na çon te Misery e Stephen King-ut; nëpërmjet një operacioni mashup që Borges-i vetë do ta kish përshëndetur.
A nuk pat kërkuar ai dikur që De Imitatione Christi ta lexonim sikur ta kish shkruar Céline?
Aq më tepër që romani i Ray Bradbury-t përshkruan një botë distopike, ku librat i djegin – ose ku sytheve të Bibliotekës së Babelit u vënë flakën kudo që nxjerrin krye.
S’do të kish gjë më të natyrshme, sikur ta lexonim me bindjen se e pat shkruar Borges-i.
Tablonë e ndërlikon prania e tretë – il terzo incomodo – ose Stephen King-u; autor i letërsisë horror, ose i metafizikës së të përditshmes amerikane. Misery shtjellohet si historia e një shkrimtari të torturuar prej një lexueseje psikotike – por edhe aty një nga elementet kyçe të rrëfimit është zjarri; dhe pikërisht ai zjarr që do të djegë dorëshkrimin e veprës Misery’s Return.
Pa dashur, Amazon-i ka krijuar kështu një kryevepër post-moderne, me shkrimtarë që shkrihen mes tyre, mis-atribuime dhe libra të ngritur mbi motive shtegtuese.
Koinçidencë kuptimplote, me gjuhën e Jung-ut.