ÇABEJ PËR TË GJITHË

Që sot, po fillojmë të nxjerrim në blog pjesë nga veprat dorëshkrim të Eqrem Çabejt, të cilat e bija Brikena, që edhe po i përgatit këto dorëshkrime për botim, pati mirësinë të na i dërgojë.

Vepra e Çabejt përfaqëson pjekurinë e dijes albanologjike, si sintezë e punës së albanologëve klasikë, të kategorisë së Meyer-it dhe Joklit dhe e njohjes kapilare të vetë shqipes, në të gjitha shfaqjet e saj vernakulare dhe diturore, prej autorit.

Si e tillë, ajo mbetet sot e kësaj dite e pakapërcyer, veçanërisht në lëmin e historisë së fjalës shqip, ose të rrethprerjes midis gjuhës dhe kulturës sonë.

Etimologjitë e Çabejt janë botuar në revistat shkencore në Tiranë dhe Prishtinë, në Veprën Gjuhësore të Çabejt botuar në Prishtinë dhe më pas në serinë Studime Etimologjike në Fushë të Shqipes, e cila ende nuk ka përfunduar.

Kësaj serie i përkasin edhe ata pak shembuj të etimologjive të Çabejt, që do të nxjerrim në blog; të cilët mund të jenë botuar më parë, por që tani i vijnë lexuesit në formë të plotë dhe ashtu siç do të kish dashur vetë autori, pas rindërtimit që ia ka bërë tekstit Brikena, duke e krahasuar me dorëshkrimin origjinal.

Materialet mund të ndiqen lehtë edhe nga një lexues jo i fushës, meqë Çabej shkruan për t’u ndriçuar mendjet të tjerëve, jo për t’i impresionuar këta me erudicionin dhe mjeshtërinë e vet (që i ka pasur si pakkush tjetër).

Leximi do të ketë rastin të konfirmojë edhe rëndësinë e pashoqe që merr historia e gjuhës, veçanërisht e fjalëve, për një kulturë të shkruar vonë, si e jona.

E falënderoj Brikenën për këtë dhuratë të vyer, gjithë duke shpresuar se kontakti me prof. Çabejn, këtu në blog, do të afrojë një brez të ri lexuesish me veprën e këtij dijetari dhe shqiptari të madh.

Nuk ka komente

  1. Sa per mua, kjo do te ishte ngjarja me e bukur dhe me e vlere ne historine e blogut. Nje falenderim rrenjesisht te thelle Brikenes dhe Xhaxhait.

    1. Blogu ka vendin e tij dhe shtimi qe do i behet me tej eshte nje dicka me shume (me vlera te padiskutueshme sigurisht).
      Le ti mbajme vec keto thesare, njeri ve me ne pah vlerat e tjetrit.

  2. Nese do te fillohej ndonje fushate per marrjen ne mbrojtje nga institucionet shteterore te te gjithe vepres se Cabejit do te firmosja i pari.
    I ka shkuar ndonjehere ndermend njeriut qe kur flasim per Cabejin dhe punen e tij flasim per nje monument kulturor dhe si te tille duhet ta ruajme? Ka marre ndonjeri iniciativa ne kete drejtim ne Ministrine e Kultures (tani qe kemi edhe nje ministre qe gjuhet i ka patur deri para pak kohesh si buken e perditshme e shoh si moment te favorshem)?
    Xhaxhai mund te na jape ndonje info per kete.

Lini një përgjigje

Zbuloni më tepër nga Peizazhe të fjalës

Pajtohuni tani, që të vazhdoni të lexoni dhe të përfitoni hyrjen te arkivi i plotë.

Vazhdoni leximin