ROUHANI RIFORMATON CAMPIDOGLIO-N

Këto ditë Italinë e vizitoi Presidenti i Iranit, Hassan Rouhani, që mes të tjerash dha edhe një konferencë shtypi, së bashku me kryeministrin italian Renzi, në Sala Esedra në Campidoglio.

Për të mos lënduar ndjeshmëritë e ndryshme të mikut nga Irani, ndaj lakuriqësisë në artin publik, autoritetet italiane kishin marrë vendimin që t’i mbulonin, me panele të bardha disa prej statujave në Musei Capitolini.[1]

Me këtë rast korridoret e muzeut befas morën një pamje si të pikturuar prej De Chirico-s.

foto

Ky fotomontazh tregon statujën origjinale (djathtas) dhe prizmin e bardhë që pa mysafiri i lartë nga Irani. Kolona antike në sfond tani shërben për të surrealizuar – si zbutëse e kontrastit midis skulpturës jashtëzakonisht fine dhe bllokut gjeometrik abstrakt.

Masat e bardha, prizmatike, që fshehin trupat e zhveshur të Venerave Kapitoline dhe të statujave simotra lënë shteg për një festë interpretimesh.

Më një anë, mund t’i këqyrësh si prani gjithnjë e vëllimshme, por gjeometrike abstrakte, me të cilën mund të riprodhohet femra e zhveshur në skulpturë, për mendësinë e Tjetrit nga larg.

Por me pak imagjinatë, mund t’i konsiderosh edhe bllokun e mermerit, prej nga skulptori ende nuk e ka nxjerrë skulpturën e vet: ose si një masë ende të virgjër ndaj daltës.

Dhe më në fund, pse të mos i marrësh edhe si vepra të artit avant-garde, mundësisht me ndonjë diciturë të tipit “Volum 37” ose “Aneks modular 4” – para së cilës t’u dridhen gjunjët turisteve nga Seuli?


[1] Të panumërta ishin debatet dhe komentet, rreth këtij gjesti të palës italiane, që për disa konfirmoi gjunjëzimin e Europës së ndriçuar dhe mendjehapur, ndaj tabuve dhe obskurantizmit të Islamit; ndërsa për të tjerë shembëllzoi mirëkuptimin e Perëndimit ndaj vlerave ndryshe të mysafirëve. Mbulimi i një statuje gjithnjë dhemb, por edhe mysafiri duhet sajdisur disi – dhe ndoshta nuk ishte vendi për t’i provokuar iranianët me art.

Lini një përgjigje

Zbuloni më tepër nga Peizazhe të fjalës

Pajtohuni tani, që të vazhdoni të lexoni dhe të përfitoni hyrjen te arkivi i plotë.

Vazhdoni leximin